देवानंद रोचकरी यांची न्यायालयीन कोठडीत रवानगी

तुळजापूर  - महाराष्ट्राची कुलस्वामिनी आई तुळजाभवानी मातेच्या तुळजापूर  येथील प्राचीन मंकावती तिर्थकुंड हडप प्रकरणी देवानंद साहेबराव रोचकरी आणि त्यांचा बंधू बाळासाहेब साहेबराव रोचकरी यांची सहा दिवसाची पोलीस कोठडी संपल्यानंतर आज न्यायालयीन कोठडीत रवानगी करण्यात आली. दरम्यान, रोचकरी यांचा जामीन अर्ज न्यायालयाने फेटाळला आहे. 

मंकावती तिर्थकुंड हडप प्रकरणी  देवानंद साहेबराव रोचकरी आणि त्यांचा बंधू बाळासाहेब साहेबराव रोचकरी यांच्यासह इतर आरोपीं विरोधात तुळजापूर पोलीस ठाण्यात १० ऑगस्ट रोजी गुन्हा नोंद आहे.त्यानंतर दोघे बंधू फरार होते. दि.१८ ऑगस्ट रोजी पोलिसांनी रोचकरी यास मुंबईत मंत्रालय परिसरात अटक केली होती. 

त्यानंतर  पोलिसांनी देवानंद साहेबराव रोचकरी आणि त्यांचा बंधू बाळासाहेब साहेबराव रोचकरी यांना तुळजापूर तालुका न्यायालयात उभे केले असता, सात दिवसाची पोलीस कोठडी मागितली होती. मात्र न्यायालयाने पाच दिवसाची म्हणजे  २३ ऑगस्टपर्यंत पोलीस कोठडी सुनावली आली होती. त्यानंतर एक दिवस पोलीस कोठडी वाढवण्यात आली होती. 

आज पुन्हा न्यायालयात उभे करण्यात आले असता, रोचकरी यांची न्यायालयीन कोठडीत रवानगी करण्यात आली. आज रोचकरी यांच्या वकिलांनी जामीन अर्ज दाखल केला होता पण तो न्यायालयाने फेटाळला आहे. 

काय आहे तीर्थकुंड प्रकरण ?

तुळजापूरची तुळजा भवानी हे अवघ्या महाराष्ट्राचे अराध्य दैवत आहे. देवीच्या दर्शनासाठी प्रत्येक भाविक वर्षातून एकदा का होईना इथे दर्शनासाठी येतोच. या धार्मिक व ऐतिहासिक स्थळामधील प्रत्येक जागा भाविकभक्तांसाठी पावित्र्याचे व मांगल्याचे प्रतीक आहे.

याच तुळजाभवानी माता मंदिर परिसरात एक पुरातन तीर्थकुंड असून, मंकावती तीर्थकुंड या नावाने ते प्रसिद्ध आहे. मात्र, हे तीर्थकुंड वारसाहक्काने आपल्याकडे आले असून हे तीर्थकुंड आपल्या खाजगी मालमत्तेचा भाग असल्याचा दावा करून भाजप नेते देवानंद रोचकरी यांनी हडपले आहे.

धार्मिक ग्रंथात आणि पुराणात उल्लेख असलेले हे तीर्थकुंड खासगी कसे काय होऊ शकते, असा भाविकांचा सवाल आहे. तुळजाभवानी मंदिरासमोरील परिसरात तब्बल 1 हजार 244 चौरस मीटर आकाराचे हे मंकावती कुंड आहे. या कुंडाची महती स्कंद पुराणात आहे. तुळजाई महात्म्य व देविविजय पुराणातही या कुंडाचा उल्लेख सापडतो. या कुंडावर पूर्वी भाविक स्नानासाठी जात. परंतु नंतरच्या काळात हे कुंड खासगी असल्याचा दावा भाजप नेते देवानंद रोचकरी यांनी केला आहे. त्यामुळे तेथे कोणी स्नानासाठी जात नाही. त्या परिसरात रोचकरी यांनी खासगी बांधकामही केलंय.

याबाबत स्थानिक व भाविकांनी आवाज उठविल्यानंतर जिल्हाधिकारी कौस्तुभ दिवेगावकर यांनी या प्रकरणात लक्ष घालून, हे कुंड हडपणाऱ्यांवर फौजदारी गुन्हे दाखल करण्याचा आदेश दिला होता. 

रोचकरी यांच्यावर मंकावती तिर्थकुंड स्वतःच्या नावावर करून हडप करण्यासाठी बोगस कागदपत्रे व पुरावे तयार करणे, फसवणूक करणे यासह कलम 420, 468, 469, 471 आणि 34 सह गुन्हा नोंद असून तपास पोलीस निरीक्षक अजिनाथ काशीद करीत आहेत. तिर्थकुंड हडप प्रकरणात रोचकरी बंधूची प्रथम खबरमध्ये नावे असून त्यांना या प्रकरणात कोण कोण मदत केली ? या कटात तुळजापूर भूमी अभिलेख कार्यालयासह नगर परिषद व इतर कार्यालयातील कोणते घोटाळेबाज अधिकारी अडकले आहेत? हे पोलीस तपासात समोर येणार असून राज्यभर गाजलेल्या या प्रकरणाचा तपास करणे व मूळ आरोपीसह कटात सहभागी अधिकारी यांना शोधणे हे एक मोठे आव्हान असणार आहे.